Yeni Suraxanıda tikintiyə görə ağaclar kəsilib? - Polis hərəkətə keçdi

Suraxanı rayonunda ağac kəsilmə faktı üzə prosessual araşdırma aparılır.

DİN Mətbuat Xidmətindən BAKU.WS-ə bildirib ki, rayonun Yeni Suraxanı qəsəbəsində yerləşən yaşıllıq sahədə ağacların kəsilməsi ilə əlaqədar polis və digər dövlət qurumlarının nümayəndələri ilə birgə baxış keçirilib.

Araşdırmanın nəticəsi ilə bağlı hüquqi tədbir görüləcəkdir.

***08:50

Bakının Suraxanı rayonu, Yeni Suraxanı qəsəbəsi, Heydər Əliyev prospekti, 414 ünvanında ağaclar kəsilib, ərazi tikinti üçün hasara alınıb.

Sosial şəbəkələrdə yayılan görüntülərdə bu ərazilərdə ağacların kəsildiyi iddia olunur. Baku TV əməkdaşları məsələ ilə bağlı hadisə yerinə yollanıblar.

Müşahidələrə əsasən, ərazidə az sayda da olsa, ağaclar kəsilib.

Eyni zamanda ərazidə əvvəlki dövrlərdə də ağacların kəsilmə izlərinə rast gəlinib. Bu isə onu göstərir ki, ərazi mərhələli şəkildə yaşıllıqdan təmizlənərək hansısa məqsədlər üçün istifadəyə hazırlana bilər.

Mövcud vəziyyətlə bağlı Suraxanı Rayon İcra Hakimiyyətindən bildirilib ki, sözügedən ərazidə heç bir ağac kəsilməsi halı mövcud deyil və hər hansı tikinti işlərinin aparılması nəzərdə tutulmayıb.