Yaşıl çay arıqlamağa kömək edir? - Bu cavab hər kəsi təəccübləndirəcək

Yaşıl çay çox zaman çəki artımının qarşısını alan və hətta kalorini yandıran içki kimi təqdim olunur. İnternetdə onun tərkibindəki komponentlərin genləri yenidən proqramlaşdırdığı və maddələr mübadiləsini sürətləndirdiyi barədə iddialar yayılıb.

BAKU.WS-in məlumatına görə, Perm Milli Tədqiqat Politexnik Universitetinin "Kimya və biotexnologiya" kafedrasının dosenti, farmasevtika elmləri namizədi Anastasiya Boteva bu fikirlərin mif olduğunu bildirib.

Alimin sözlərinə görə, yaşıl çay doğrudan da kofein, katexinlər və teanin adlı amin turşusu ehtiva edir, bunlar stimullaşdırıcı və antioksidant təsirə malikdir. Lakin onların maddələr mübadiləsinə təsiri o qədər zəifdir ki, fastfud və şirniyyatların orqanizmə zərərini kompensasiya edə bilmir.

"Bitkilərin və insanların genetik sistemləri uyğun deyil. Həzm prosesi zamanı istənilən DNT - o cümlədən çay DNT-si tam şəkildə nukleotidlərə parçalanır. Buna görə də o, bizim genlərimizə heç bir təsir göstərmir",- deyə Boteva izah edib.

Ekspert vurğulayıb ki, heç bir miqdarda yaşıl çay kalorini neytrallaşdıra bilməz: "Əgər siz 500 kalorilik tort yesəniz və onun arxasınca yaşıl çay içsəniz, orqanizm bu kaloriləri tam şəkildə qəbul edəcək. Çay onları nə yandırır, nə də mənimsənilməsini bloklayır".

Mütəxəssisin fikrincə, çayla bağlı "təmizləyici ritual"lara inanmaq zərərli vərdişlərə səbəb ola bilər:

"İnsan "detoks" adı altında daha çox şirniyyat yeməyə başlayır. Bu isə qan şəkərinin dəyişkənliyinə, xolesterinin artmasına və qaraciyərlə mədəaltı vəzinə əlavə yük düşməsinə gətirib çıxarır".

Bundan əlavə, çox güclü çayın həddindən artıq qəbulu mədə selikli qişasının qıcıqlanmasına, içkidəki taninlərin isə dəmirin mənimsənilməsini zəiflədərək anemiya riskini artırmasına səbəb ola bilər. Şəkərli çay içmək isə diş çürüməsini sürətləndirir.

"Formanı qorumaq üçün "möcüzəvi" içkilər deyil, sağlam vərdişlər lazımdır - yəni balanslı qidalanma, fiziki aktivlik, normal yuxu və sadə karbohidratların azaldılması. Yaşıl çay faydalı ola bilər, amma yalnız sağlam həyat tərzinin bir hissəsi kimi, onun əvəzi deyil",- deyə Anastasiya Boteva qeyd edib.