Sarayda 50-dən çox ailə 10 gündür susuz qalıb

"Magistral xətdə qəza olmuşdu, aradan qaldırılıb. Xəttin su ilə doldurulması prosesi gedir".

Bu barədə BAKU.WS-in sorğusuna cavab olaraq Dövlət Su Ehtiyatları Agentliyi İri Şəhərlərin (ADSEA) Birləşmiş Su Təchizatı Xidmətindən bildirilib.

"Sakinlərin su təminatı mərhələlərlə həyata keçiriləcək",-deyə məlumatda qeyd edilib.

***12:06

Abşeron rayonunun Saray qəsəbəsində ciddi kommunal problem yaranıb. Belə ki, qəsəbənin "Yeni məhəllə" adlanan yaşayış massivində, Zərifə Əliyeva küçəsində yerləşən 50-dən çox ailə artıq 10 gündür içməli sudan məhrum qalıb.

Bu barədə sakinlər BAKU.WS-in "qaynar xətti"nə müraciət edərək bildiriblər ki, suyun verilməsi qəfil dayandırılıb və bu müddət ərzində problem aradan qaldırılmayıb.

Onların sözlərinə görə, gündəlik həyat ciddi şəkildə çətinləşib – nə içməli su tapmaq asandır, nə də məişət ehtiyaclarını qarşılamaq mümkün olur. Sakinlər xüsusilə azyaşlı uşaqların, yaşlıların və xəstələrin vəziyyətinin daha ağır olduğunu qeyd edirlər.

"Artıq 10 gündür su yoxdur. Məcbur qalıb suyu pulla alırıq, bu isə hər ailə üçün əlavə xərc deməkdir. Aidiyyəti qurumlara dəfələrlə müraciət etmişik, amma hələ də konkret nəticə yoxdur," – deyə sakinlər narazılıqlarını ifadə ediblər.

Orxan Hüseyn