Sabirabadın küçələri niyə qaranlığa qərq olub?

Sabirabad rayonunda küçə işıqlandırmasının uzun müddətdir işləmədiyi bildirilir.

Sakinlərin BAKU.WS-ə bildirdiyinə görə, təxminən iki aydır rayonun müxtəlif ərazilərində, o cümlədən Muğam prospektində küçə işıqları yanmır.

Vətəndaşlar iddia edirlər ki, yaranmış vəziyyət həm piyadalar, həm də sürücülər üçün ciddi çətinliklər yaradır. Onların sözlərinə görə, son vaxtlar yol-nəqliyyat hadisələrinin sayı artıb, axşam saatlarında insanların mağazalara və digər ünvanlara rahat şəkildə getməsi çətinləşib.