Rüstəm İbrahimbəyovun qəbirüstü abidəsinin açılışı olub

Görkəmli kinodramaturq, Xalq yazıçısı Rüstəm İbrahimbəyovun I Fəxri xiyabanda ucaldılan qəbirüstü abidəsinin açılış mərasimi olub.

BAKU.WS report-a istinadən xəbər verir ki, açılış mərasimində Azərbaycan Kinematoqrafçılar İttifaqının (AKİ) İdarə Heyətinin sədri, Xalq artisti Rasim Balayev, Azərbaycan Bəstəkarlar İttifaqının sədri, Xalq artisti Firəngiz Əlizadə, deputat Sabir Rüstəmxanlı, Xalq yazıçısı Çingiz Abdullayev, Xalq yazıçısı Anar Rzayev, Bakı Musiqi Akademiyasın rektoru, Xalq artisti Fərhad Bədəlbəyli, tanınmış aktyor, aktrisalar və Xalq artistinin ailə üzvləri iştirak edib.

Anar Rzayev çıxışına "Gəzməyə qərib ölkə, ölməyə Vətən yaxşı" bayatısının misraları ilə başlayıb və R.İbrahimbəyovun yaradıcılığını yüksək qiymətləndirdiyini qeyd edib.

Rasim Balayev xatırladıb ki, R.İbrahimbəyovun vəfatından artıq bir il ötür:

"İllər tez-tez keçir. Onun işlərini biz onun kimi edə bilmirik, onu əvəz edə bilmirik. Elə adam var evdən gedir, elə adam var eldən gedir. Respublikamız üçün çox böyük itki oldu. Rüstəm sənəti ilə, qabiliyyəti ilə, intellektual səviyyəsi ilə bütün dünyada məşhur bir adam idi. Azərbaycanı çox bacarıqla vəsf edirdi".

Ç.Abdullayev R.İbrahimbəyovun qəbirüstü abidəsini bəyəndiyini vurğulayıb:

"Rüstəm özü də bu abidəni bəyənərdi. Mən fəxr edirəm ki, onunla dost olmuşam".

Qəbirüstü abidənin müəllifi A.Zeynalov hazırlıq prosesi barədə məlumat verib:

"Abidəni hazırlamaqdan məmnunam. Əsərin eskizini ailə ilə birgə hazırlamışıq".