Rusiyaya gedən azərbaycanlı miqrantların NƏZƏRİNƏ: Yeni arayış təqdim edilməlidir

Rusiyaya gedən azərbaycanlı miqrantlar bundan sonra tibbi arayış təqdim etməlidirlər.

BAKU.WS "Oxu.az"a istinadən xəbər verir ki, arayış kağız daşıyıcıda Daxili İşlər Nazirliyinin miqrasiya məsələləri üzrə idarəsinə, yaxud elektron formada, rəqəmsal imza ilə idarənin ərazi orqanına təqdim edilə bilər.

“Rusiyaya 90 gündən artıq müddət üçün gedən əmək miqrantları və əcnəbi vətəndaşlardan dekabrın 29-dan etibarən Daxili İşlər Nazirliyinə HİV infeksiyasına yoluxmaması və narkomaniya asılılığının olmaması barədə arayış tələb oluna bilər”, - deyə RF DİN-in hazırladığı sənədin layihəsində bildirilir.

Əcnəbilər əvvəllər verilmiş arayışların müddətinin bitdiyi tarixdən 30 gün ərzində tibbi sənədləri təqdim etməlidirlər. Yetkinlik yaşına çatmayanlar üçün isə bu işlə valideynlər, qəyyumlar və ya nümayəndələri məşğul olacaq.

Sənəd xarici dildə tərtib olunubsa, rus dilinə tərcümə edilməli və notarius tərəfindən təsdiqlənməlidir.

Təqdim edildikdən sonra miqrantın ünvanına qəbz və ya elektron poçt ünvanı verilir, məlumatlar daxil olduğu gündən üç iş günü müddətində Daxili İşlər Nazirliyinin informasiya sisteminə daxil edilir.