Plovdan şirniyyata… - Bayramda ac qalmadan sağlam qidalanmağın YOLLARI

Azərbaycanda Novruz bayramı münasibətilə süfrələr ənənəvi təamlarla bəzədilir. Şəkərbura, paxlava, plov və müxtəlif şirniyyatların bol olduğu bayram günlərində isə sağlam qidalanma məsələsi aktuallaşır.

BAKU.WS xəbər verir ki, bayramda əsas prinsip qadağalar deyil, balans və porsiya nəzarətidir.

Dietoloqların sözlərinə görə, şəkərbura və paxlava kimi şirniyyatlar yüksək kalorili olduğundan gün ərzində 1-2 ədəd ilə kifayətlənmək tövsiyə olunur. Şirniyyatların acqarına deyil, əsas yeməkdən sonra qəbul edilməsi qanda şəkərin kəskin artmasının qarşısını ala bilər. Eyni zamanda, şirin qidalarla birlikdə qazlı və şəkərli içkilərdən uzaq durmaq məsləhətdir.

Plovdan isə tam imtina etməyə ehtiyac olmadığı qeyd olunur. Sadəcə porsiyanı kiçik saxlamaq, daha az yağlı ət növlərinə üstünlük vermək və yeməklə birlikdə bol göyərti və salat qəbul etmək daha məqsədəuyğundur.

Mütəxəssislər bayram günlərində su balansının qorunmasının da vacib olduğunu vurğulayırlar. Çay və şirniyyatın çox qəbul edildiyi günlərdə kifayət qədər su içmək həzmi yaxşılaşdırır və artıq qidalanmanın qarşısını almağa kömək edir.

Bundan əlavə, bayram süfrəsindən sonra qısa gəzintilər etmək həm həzmi sürətləndirir, həm də ümumi sağlamlıq üçün faydalıdır.

Qeyd olunur ki, Novruz ildə bir dəfə qeyd olunur və əsas məqsəd özünü məhrum etmək deyil, ölçülü və balanslı qidalanmaqdır.