İnam Kərimov karantin rejimindən danışdı

“Hazırkı mərhələdə koronavirusun yayılmasının qarışısını almaq üçün dövlət tərəfindən görülən zəruri tədbirlərin fermerlərin fəaliyyətinə ciddi təsiri yoxdur”.

BAKU.WS “report”a istinadən xəbər verir ki, bunu Kənd Təsərrüfatı naziri İnam Kərimov bildirib.

Onun sözlərinə görə, aqrar sektorda fəaliyyət xüsusi karantin rejimi tələblərinə uyğun qurulur:

“Nazirlər Kabinetinin müvafiq qərarına əsasən, rayonlardan orta və iri tonnajlı maşınlarla paytaxta, digər böyük şəhərlərə və rayonlara kənd təsərrüfatı və ərzaq məhsullarının daşınmasına icazə verilir.

Fermerlər yerli icra hakimiyyəti orqanlarından aldıqları arayış əsasında məhsullarını sərbəst şəkildə paytaxt, böyük şəhərlər və rayonlara gətirib sata bilərlər.

Həmçinin məhsullar heç bir maneə olmadan bazarlara çıxarılır, eyni zamanda xarici ölkələrə ixrac edilir”.

Xatırladaq ki, yeni koronavirus (COVID-19) infeksiyasının geniş yayılmasının qarşısının alınması məqsədilə Nazirlər Kabineti yanında Operativ Qərargahın müvafiq qərarlarına uyğun olaraq, ölkəmizdə tətbiq edilən xüsusi karantin rejimi çərçivəsində avtonəqliyyat vasitələrinin hərəkətinə müəyyən məhdudiyyətlər tətbiq olunur.