Metroda gediş haqqının bahalaşacağı xəbərinə RƏSMİ AÇIQLAMA

"Metroda gediş haqqının artırılacağı ilə bağlı yayılan xəbərlər və orada əks olunan rəqəmlər həqiqəti əks etdirmir”.

Bu barədə BAKU.WS-ə "Bakı Metropoliteni” QSC-nin mətbuat xidmətinin rəhbəri Nəsimi Paşayev bildirib. 

"Bakı Metropoliteni” olaraq, biz Tarif Şurasına qiymətin artırılması ilə bağlı müraciət etməmişik. Tarif Şurasına müraciət edilməmiş qiymətlər artırıla bilməz. O ki, qaldı bir sərnişin daşınması üçün xərcin 82,4 qəpik olmasına, bu rəqəm cəfəngiyyatdır. Hesablama Palatası hər ilin sonunda bununla bağlı rəsmi rəqəmləri açıqlayır. Palata 2015-ci ildə bir sərnişinin daşınmasına çəkilən xərci 54 qəpik göstərmişdi. Cari ilin sonunda bu il bir sərnişinin daşınmasına çəkilən xərc açıqlanacaq”, - Paşayev əlavə edib.

Qeyd edək ki, "Azadlıq radiosu” Dövlət Statistika Komitəsinin (DSK) açıqladığı rəqəmlərə istinad edərək gəlir və xərc nəzərə alınmaqla, bir sərnişinin daşınmasının metropolitenə 82,4 qəpiyə başa gəlməsiobarədə məlumat yayıb.

BAKU.WS