Hökümə Əliyevanın stüardessa həmkarı: "Hər uçuşdan əvvəl mənə ismarış yazıb, uğurlar arzulayardı..."

"Hökümə ilə dostluğumuz AZAL-ın Bakı-Mumbay-Bakı reysində başlayıb. Onunla otaq yoldaşı olmuşam. Ezamiyyət günlərində sevincimizi, kədərimizi bölüşmüşük. Həmin səfərdən videolarımız da qalır. Bakıya qayıdandan sonra o, hər uçuşdan əvvəl mənə ismarış yazıb, uğurlar arzulayardı. İndi o ismarışlara baxanda özümə gələ bilmirəm".

Bu sözləri AZƏRTAC-ın müxbiri ilə söhbətində AZAL-ın təyyarə bələdçisi Çinarə Məmmədova Bakı-Qroznı uçuşunu yerinə yetirərkən Aktauda qəzaya uğrayan təyyarədə həlak olan stüardessa Hökümə Əliyeva haqqında danışarkən deyib. Çinarə həmkarı Hökümənin işində çox peşəkar, bütün təlimatlara uyğun hərəkat edən, həmkarları arasında subordinasiyanı qoruyan bir işçi kimi tanındığını bildirib.

"Hadisədən xəbər tutanda biz Bakı-Pekin-Bakı reysi ilə əlaqədar Pekin şəhərindəydik. Xəbəri eşidəndə həmkarlarımın adını axtarmağa başladım və ekipaj üzvləri arasında Hökümənin adını görəndə çox pis oldum", - deyə Çinarə bildirib.

Hökümə Əliyeva haqqında bir xatirəsini paylaşan Çinarə Məmmədova deyib: "Mumbay reysindən qayıtdıqdan sonra onu növbəti dəfə Dehli reysinə yazmışdılar. Hökumə ismarış yazaraq, mənim də həmin uçuşda olub-olmayacağımı soruşdu. Amma mən məzuniyyətdə olduğum üçün həmin uçuşda iştirak edə bilmədim. Peşmanam, kaş ki, məzuniyyətdə olmazdım və qismət, bəlkə də Hökumə ilə yenə birgə uçardım".

Çinarə Məmmədova bildirib ki, pilotlarımız, ekipaj üzvləri onlarla insanın həyatını xilas etməklə bütün dünyaya "Azərbaycan Hava Yolları"nın pilotlarının peşəkarlığını sübut edib.

Qeyd edək ki, dekabrın 25-də "Azərbaycan Hava Yolları" aviaşirkətinin J2-8243 nömrəli Bakı-Qroznı reysini yerinə yetirən "Embraer 190" təyyarəsi Aktau şəhəri yaxınlığında qəzaya uğrayıb. Hadisə nəticəsində 38 nəfər, o cümlədən heyət üzvləri - gəmi komandiri İqor Kşnyakin, pilot Aleksandr Kalyaninov və stüardessa Hökümə Əliyeva həlak olub, 29 nəfər yaralanıb.