Bu gün "Cümə, ayın 13-ü" - BƏDBƏXTLİK gətirir?

Bu gün həm ayın 13-nə, həm də cümə gününə təsadüf edir. Qərb ölkələrində geniş yayılmış inanclara görə, bu tarix "Cümə, ayın 13-ü" kimi tanınır və uzun illərdir uğursuz gün hesab edilir.

BAKU.WS xəbər verir ki, tarixçilərin və araşdırmaçıların fikrincə, bu inanc əsasən Qərb mədəniyyətində formalaşıb və iki ayrı mifin birləşməsindən yaranıb. Belə hesab edirlər ki, 13 rəqəmi uğursuzdur, cümə günündə isə mənfi hadisələr daha çox baş verir. Orta əsrlərdən bəri bəzi inanclara görə cümə günü yeni işə başlamaq və ya səfərə çıxmaq uğursuz hesab olunurdu.

13 rəqəmi ilə bağlı inancın kökləri də müxtəlif dini və tarixi hadisələrlə əlaqələndirilir. Xristian ənənəsində İsa Məsihin son şam yeməyində 13 nəfərin iştirak etdiyi, ertəsi gün, yəni cümə günü çarmıxa çəkildiyi qeyd olunur. Bu səbəbdən bəzi inanclara görə 13 rəqəmi ilə cümə gününün üst-üstə düşməsi "ikiqat uğursuzluq" kimi qəbul edilməyə başlayıb.

Tarixdə bu tarixlə əlaqələndirilən hadisələrdən biri də 1307-ci il oktyabrın 13-də baş verib. Həmin gün Fransa kralı IV Filipp Tampliyer ordeninin üzvlərinin kütləvi şəkildə həbs olunması barədə göstəriş verib. Bəzi tədqiqatçılar hesab edir ki, bu hadisə də "Cümə, ayın 13-ü"nün uğursuz gün kimi tanınmasına təsir göstərib.

Araşdırmalara görə, təqvimdə hər il ən azı bir dəfə "Cümə, ayın 13-ü" olur, bəzi illərdə isə bu tarix üç dəfə təkrarlana bilər. 2026-cı ildə belə günlər fevralın 13-ü, martın 13-ü və noyabrın 13-nə təsadüf edir.

Bununla yanaşı, alimlər və statistik araşdırmalar bu günün digər tarixlərlə müqayisədə daha çox bədbəxt hadisə ilə müşayiət olunduğunu təsdiqləmir. Mütəxəssislərin fikrincə, "Cümə, ayın 13-ü" ilə bağlı qorxu daha çox folklor, mədəni inanclar və psixoloji təsəvvürlərlə bağlıdır.

Qeyd etmək lazımdır ki, bu inanc dünyanın bütün ölkələrində eyni şəkildə qəbul edilmir. Məsələn, İspaniya və Yunanıstanda uğursuz gün kimi "ayının 13-nə təsadüf edən çərşənbə axşamı" göstərilir.

Beləliklə, "Cümə, ayın 13-ü" tarixən müxtəlif mif və inanclarla əlaqələndirilsə də, elmi baxımdan digər günlərdən fərqli və ya təhlükəli hesab edilmir. Buna baxmayaraq, dünyanın bəzi ölkələrində insanlar bu tarixdə mühüm qərarlar verməkdən və ya riskli addımlar atmaqdan çəkinməyə üstünlük verirlər.