Azərbaycanda 40 dərəcədə avtomobillər niyə yanır? - SƏBƏBLƏR

Bu günlər Azərbaycanda müşahidə edilən 40 dərəcəyə çatan yüksək temperatur paytaxt sakinlərinin gündəlik həyatına bir sıra çətinliklər gətirməklə yanaşı, avtomobil sahibləri üçün də ciddi təhlükələr yaradıb.

BAKU.WS-in məlumatına görə, paytaxtın bir neçə istiqamətdə – sonuncu dəfə isə Zabratda avtomobillərdə yanğın halları qeydə alınıb.

View this post on Instagram

A post shared by @baku.ws_official

Bu cür halların intensivləşməsi ciddi narahatlıq doğurur. Bəs, bu yanğınların səbəbləri nədir və sürücülər necə önləyici tədbirlər görə bilərlər?

Beynəlxalq ekspertlər hesab edir ki, havanın ekstremal dərəcədə isti olması mühərrikin həddindən artıq qızmasına səbəb olur. Əgər soyutma sistemi zəifdirsə və ya antifriz səviyyəsi aşağıdırsa, bu, mühərrikdə alışma və nəticə etibarı ilə yanğınla nəticələnə bilər.

Qızmar hava naqillərin daha tez isinməsinə və köhnə, izolyasiyası zəif naqillərdə qısaqapanma baş verməsinə şərait yaradır. Bu da alışma riskini artırır.

View this post on Instagram

A post shared by @baku.ws_official

Eyni zamanda isti hava şəraitində benzin və dizelin buxarlanması sürətlənir. Əgər yanacaq sistemində hər hansı sızma varsa, bu, çox tez alovlana bilər. Xüsusilə, benzin buxarının mühərrik və akkumulyator yaxınlığında toplanması yanğın üçün real təhlükədir.

Ekspertlər qeyd edir ki, yüksək temperaturda uzun məsafəli və ya dağlıq ərazilərdə gedən sürücülərin əyləcləri və təkərləri daha tez qızır. Bu da təkərin partlaması və ya yanma riski ilə nəticələnə bilər.

Sürücülər üçün təhlükəsizlik tövsiyələri

Mütəmadi texniki baxış keçirin

Xüsusilə yay aylarında avtomobilinizin soyutma sistemi, elektrik naqilləri, yanacaq xətləri və əyləc sistemi yoxlanmalıdır.

Yanğınsöndürən vasitə daşıyın

Hər bir avtomobildə işlək vəziyyətdə olan yanğınsöndürən balon olmalıdır. Bu, ilkin mərhələdə yanğının qarşısını almağa kömək edə bilər.

Aşırı yüklənmədən çəkinin

Avtomobilin daşıya biləcəyindən artıq yük istər mühərrikə, istərsə də təkərlərə əlavə gərginlik yaradır. Bu da qızmaya səbəb ola bilər.

Avtomobili birbaşa günəş altında saxlamayın

İmkan daxilində avtomobilinizi kölgəli yerlərdə saxlayın və ya üzərini örtün. Salon daxilindəki temperaturun kəskin artması bəzi hissələrin deformasiya olmasına və qısaqapanmaya səbəb ola bilər.

Qoxulara və siqnallara biganə qalmayın

Avtomobildə qeyri-adi yanıq qoxusu, tüstü və ya hər hansı xəbərdarlıq işığı görsəniz, dərhal avtomobili dayandırın və təhlükəsizlik tədbirləri görün.

Qeyd edək ki, havanın bu qədər isti olduğu bir dövrdə sürücülərin məsuliyyəti ikiqat artır. Yanğın riski ilə qarşılaşmamaq üçün avtomobilin texniki vəziyyətini daim nəzarətdə saxlamaq, diqqətli və ehtiyatlı olmaq vacibdir. Unutmayaq ki, cüzi bir laqeydlik böyük faciəyə çevrilə bilər.

Orxan Hüseyn