Bakı-Ağdam sərnişin qatarı təyinat məntəqəsinə çatdı – Cədvəl, qiymətlər və xidmətlər

Bu gün Bakıdan saat 07:10-da Ağdama yola düşmüş sərnişin qatarı təyinat məntəqəsinə çatıb.

BAKU.WS xəbər verir ki, bununla da 32 illik fasilədən sonra ilk Bakı-Ağdam qatar reysi reallaşıb.

*** 07:50

Bu gündən etibarən Bakı–Ağdam–Bakı marşrutu üzrə sərnişin qatarlarının hərəkətinə start verilib. 32 ildən sonra Ağdama ilk sərnişin qatarının yola düşməsi Böyük Qayıdış prosesinin daha bir əlamətdar hadisəsi kimi qiymətləndirilir.

BAKU.WS xəbər verir ki, "Azərbaycan Dəmir Yolları" QSC-nin (ADY) məlumatına görə, sərnişinlər İsveçrənin "Stadler" şirkətinin istehsalı olan müasir "FLIRT" markalı qatarlarla səyahət edəcəklər. Sonuncu dəfə bu istiqamətdə sərnişin qatarı 1993-cü ildə hərəkət etmişdi. O zaman Bakıdan Ağdama qədər olan 371 km məsafə 8 saat yarıma qət olunurdu.

Qatarların hərəkət qrafiki belədir:

-Bakıdan Ağdama qatar hər şənbə saat 07:10-da yola çıxır və 11:53-də Ağdama çatır.

-Ağdamdan Bakıya qayıdış isə eyni gün saat 18:20-də başlayır, qatar 22:55-də Bakı Dəmiryol Vağzalına daxil olur.

Marşrut üzrə qatar Bakı, Biləcəri, Ucar, Ləki, Yevlax, Bərdə, Köçərli, Təzəkənd və Ağdam stansiyalarında dayanacaq edir.

Bakıdan Bərdə, Köçərli və Təzəkənd stansiyalarına qədər biletlərin minimum qiyməti 12 manat, Ağdam Dəmir Yolu və Avtovağzal Kompleksinə qədər isə 12 manat 80 qəpik təşkil edir.

Sərnişinlər üçün standart, standart+, biznes və birinci sinif səyahət imkanları mövcuddur. Həmçinin qatarın daxilində ödənişsiz Wi-Fi xidməti təqdim olunur.

Xatırladaq ki, bu marşrut üzrə biletlərin satışına avqustun 27-dən başlanılıb. Bilet alışı zamanı icazə sistemi avtomatik şəkildə təmin edilir ki, bu da işğaldan azad edilmiş ərazilərə səyahəti daha rahat və təhlükəsiz edir.

Bakı–Ağdam dəmir yolu Qarabağ iqtisadi rayonunda ictimai nəqliyyatın əlçatanlığını artırmaqla yanaşı, Ağdam və ətraf bölgələrin sosial-iqtisadi inkişafına və Böyük Qayıdışa mühüm töhfə verəcək