Ondan ödəniş tələb edilməsi ilə bağlı iddia irəli sürən tələbə universitetdən xaric edildi - YENİLƏNİB

"Artıq həmin tələbə barəsində universitetdən xaricolma əmri verilib".

Bu sözləri BAKU.WS-ə açıqlamasında Qərbi Kaspi Universitetinin mətbuat katibi Vüsal Məmmədov bildirib.

"Universitet tələbəyə təhsil haqqında güzəşt təklif edib və bildirilib ki, növbəti ildə dövlət sifarişli yerlərə qəbul olunmuş tələbə yeri boşalsa, tələbənin həmin yerə keçməsi üçün universitet müraciət edə bilər. Bu da tamamilə hüquqidir. Təhsil haqqında qanun buna imkan verir. Tələbə bu təklifi də qəbul etmədiyi üçün onun barəsində xaricolma əmri verilib", - deyə mətbuat katibi əlavə edib.

***15:24

Qərbi Kaspi Universitetinin tələbəsi ödənişsiz əsaslarla daxil olduğu fakültədə 3 ay təhsil aldıqdan sonra ondan pul tələb olunduğunu idda edir. 

Bu barədə BAKU.WS-in "qaynar xətti"nə daxil olan şikayətə görə, 2022-ci ildə Mənəfova Ləman Namiq qızı universitetin Biologiya fakültəsinə ödənişsiz əsaslarla daxil olub.

O burada 3 ay təhsil aldıqdan sonra, məlum olub ki, tələbə əslində ödənişli əsaslarla qəbul olubmuş.

Şikayətçinin sözlərinə görə, ailənin maddi imkanı aşağı olduğuna görə, təhsili dondurmalı olublar. Hətta, universitet ödənişlə bağlı müəyyən yardım göstərməyi də onlara təklif edib ki, təhsil yarımçıq qalmasın. Buna baxmayaraq ailənin maddi vəziyyəti yenə də tələbənin təhsil haqqını ödəməyə yetmir. 

Məsələ ilə bağlı Qərbi Kaspi Universitetinin mətbuat katibi Vüsal Məmmədov BAKU.WS-ə açıqlamasında bildirdi ki, ödənişsiz əsaslarla qəbul olan tələbədən daha sonra təhsil haqqı tələb edilməsi mümkün deyil. Burada başqa səbəblər var:

"Bunun səbəbi var. Dövlət İmtahan Mərkəzində qeydiyyatını birinci turda təsdiqləməyib. DİM ona güzəştə gedərək onu ikinci turda universitetə qəbul edib. Məsələ ilə bağlı Elm və Təhsil Nazirliyi və Dövlət İmtahan Mərkəzinə müraciət etməlidir. Burada universitetlik bir şey yoxdur. Tələbə düşünür ki, birinci turda ödənişsiz əsaslı təhsilə qəbul olub. Ancaq elə olmayıb. Qeydiyyatı təsdiqləməyi gecikib deyə DİM onu ikinci turda qəbul edib. Bu səbəbdən təhsil ödənişli olub. Çox güman, tələbə məsələdən ondan ödəniş tələb edilən zaman xəbər tutub".