İsrail İranın hücumu zamanı Britaniya və Fransanın dəstəyinə ümid edir

İsrailin xarici işlər naziri İsrael Katz Böyük Britaniya və Fransadan olan həmkarları ilə Qüdsdə görüş keçirib. Onların İsrailə səfərinin əsas mövzularından biri İranın İsrailə hücum təhlükəsi olub.

Bunu İsrailin Xarici İşlər Nazirliyinin mətbuat xidməti bildirib.

"Xarici işlər naziri Katz, Fransa və Britaniyanın xarici işlər nazirlərinə İsrailin gözləntilərini çatdırıb ki, iki ölkə İrana açıq şəkildə İsrailə hücum etməyin qadağan olduğunu bildirməlidir. Hücum baş verərsə, ABŞ-nin rəhbərlik etdiyi koalisiya İsrailə yalnız müdafiə məsələsində deyil, həm də İrandakı mühüm obyektlərə qarşı cavab zərbəsinə qoşulmalıdır",-deyə məlumatda qeyd olunur.

Rəsmi Təl-Əviv hesab ediur ki, əgər İranın İsrailə qarşı birbaşa və ya proksi qüvvələrlə hücumu dayanmazsa, Tehran strateji və iqtisadi sahələrdə böyük bir bədəl ödəməli olacaq və bu, genişmiqyaslı müharibəni qarşısını almağın yeganə şansıdır.