İsmayıl Haniyə sui-qəsd: O, necə vuruldu? - Dünya mətbuatı yazır

İranın paytaxtı Tehranda baş verən və bütün dünyada böyük əks-səda doğuran HƏMAS Siyasi Bürosunun sədri İsmayıl Haniyənin öldürülməsi ilə bağlı təfərrüatlar ortaya çıxmağa başlayıb. Sui-qəsdlə bağlı ən maraq doğuran məsələ Tehranın ortasında bu qədər dəqiq atəşin necə edildiyidir. Haniyənin ölümünə səbəb olan raketin mahiyyəti və harada atıldığı müzakirə edilərkən, müxtəlif iddialar gündəmdədir. Tehran administrasiyasına yaxın xəbər qurumları raketin İran xaricindən atıldığını iddia edərkən, bəzi media orqanları raketin üçüncü ölkədən atıldığını iddia edib. Ancaq İrandan gələn bu cür bəyanatların nə dərəcədə etibarlı olduğu bilinmir.

BAKU.WS CNN TÜRK-ə istinadən xəbər verir ki, İsrail mətbuatında yer alan xəbərlərə görə, raket xaricdən deyil, İranın içindən atılıb. Bu məlumatlarda hücumun böyük ehtimalla çiyindən atılan 25 kilometr mənzilli “Spike” raketi ilə həyata keçirildiyi bildirilir.

Hərbi ekspertlərin vurğuladığı digər iddia isə hücumun F-35-lər tərəfindən həyata keçirildiyidir. Müvafiq olaraq F-35-in radardan yayınma xüsusiyyətlərindən istifadə edərək Tehrana yaxınlaşıb və raketlər atılıb. Mütəxəssislər dəqiq atəşin ancaq bu yolla mümkün olduğunu bildiriblər. Digər iddia isə hücumda “uzaqdan idarə olunan bomba”dan istifadə edildiyidir.

“New York Times” qəzeti Haniyənin raketlə deyil, Tehranda qaldığı qonaq evinə gizli şəkildə uzaqdan idarə olunan bomba ilə öldürüldüyünü iddia edib. Başqa bir iddia isə partlayıcı qurğunun təxminən 2 ay əvvəl gizli şəkildə Tehranda İnqilab Keşikçiləri Korpusunun binasına gətirildiyidir.

Digər tərəfdən Tehranda Haniyənin öldürüldüyü binanın fotoşəkilləri yayılıb. Belə ki, İran mətbuatında dərc olunan fotoda binanın bir hissəsinin zədələndiyi görünür. Eyni binanın peyk şirkəti Maxar Technologies tərəfindən cəmi 6 gün əvvəl, iyulun 25-də çəkilmiş başqa bir görüntüdə heç bir ziyan görünmür. Bu da zərərin yaxınlarda olduğunu təsdiqləyir. Açıq peyk görüntülərində Haniyənin yerləşdiyi binanın İnqilab Mühafizəçiləri tərəfindən qorunan kompleksin içərisində, Sədabat Sarayı Parkının yaxınlığında yerləşdiyi və qismən şəhərə, lakin əsasən dağlara baxan geniş fasadı olduğu görünür. Binanı kampusdan çox uzaqdan və ya dağlıq ərazidən asanlıqla görmək olar.

Qeyd edək ki, Ərazidə yaşayan insanlar sui-qəsd zamanı kiçik bir partlayış səsi eşitdiklərini bildirirlər. HƏMAS-ın Qəzza zolağındakı sədr müavini Halil əl-Həyya, şahidlərin Haniyənin yerləşdiyi otağa raketin düşdüyünü və otağın dağıdıldığını, binadakı şüşə, pəncərə, qapı və divarların bir hissəsinin yıxıldığını təsdiqləyib.