Rusiyada qocalar evində baş verən yanğında 20 nəfər ölüb - VİDEO

Rusiyanın Kemerovo şəhərində, Tavriçeskaya küçəsində yerləşən ikimərtəbəli özəl qocalar evində yanğın baş verib.

BAKU.WS oxu.az-a istinadən xəbər verir ki, bu barədə ölkənin Fövqəladə Hallar Xidməti məlumat verib.

Məlumata görə, yanğınsöndürənlər gələnə qədər binanın dam örtüyü alova bürünüb. Yanğının sahəsi 180 kvadratmetr olub. Bildirildiyinə görə, məlumatın FHN-ə gec çatdırılması yanğının güclənməsinə şərait yaradıb. Yanğınsöndürmə əməliyyatına 80-dən çox insan, 28 texnika cəlb olunub.

Yanğının söndürülməsinə nail olunub. Lakin ikinci mərtəbə tamamilə yanıb. Birinci mərtəbəsini dükanların təşkil etdiyi binada 26 nəfər olub.

Son məlumatlara görə, yanğın nəticəsində 20 nəfər ölüb. İki nəfər isə yanıq xəsarətləri ilə xəstəxanaya yerləşdirilib və vəziyyətləri ağırdır. Daha dörd nəfər ambulator müalicə üçün buraxılıb.