İlham Əliyev: "Biz bu məsələni tarixi ədalət əsasında həll etməliyik"

"Biz bu məsələni tarixi ədalət əsasında həll etməliyik. Tarixi ədalət onu deyir ki, Qarabağ qədim Azərbaycan torpağıdır və bütün tarixi sənədlər, bütün tarixi abidələrimiz bunu göstərir".

BAKU.WS xəbər verir ki, prezident İlham Əliyev bunu “TRT Haber” telekanalına müsahibəsində təklifləri şərh edərkən söyləyib.

Dövlət başçısı bildirib ki, Azərbaycan həmişə müzakirə masasında çox müsbət davranış nümayiş etdirib və müzakirə masasında olan təkliflər də bu məsələnin həllini mümkün edir.

İ.Əliyev mərhələli həll variantı barədə danışaraq deyib: “İlk mərhələdə ermənilər beş bölgədən çıxır, sonrakı mərhələdə daha iki bölgədən çıxır, ondan sonra vaxtilə Dağlıq Qarabağın ərazisindən qovulmuş azərbaycanlılar Dağlıq Qarabağa qayıdır, o cümlədən Şuşaya qayıdır, iki toplum çərçivəsində artıq həyat bərpa edilir, Ermənistan-Azərbaycan arasındakı sərhəd açılır, ticarət başlanır, ondan sonra insanlar bir-biri ilə təmasa girirlər və beləliklə, sülh gələcək.

Yəni bu, bizim mövqeyimizdir və bu, beynəlxalq vasitəçilərin, həmsədrlərin də münasibətidir. Ermənistan bunu qəbul etmir. Bundan əlavə Ermənistanın müdafiə naziri bir neçə ay öncə demişdir ki, biz yeni torpaqlar uğrunda yeni müharibəyə başlamalıyıq”.