"Yeni Klinika"nın sabiq direktoru Ali Məhkəməyə müraciət edib

"Yeni Klinika” Publik Hüquqi Şəxsin həbsdə olan sabiq direktoru Pərviz Abbasovun barəsindəki hökmdən kassasiya şikayəti verilib.

BAKU.WS "apa"ya istinadən xəbər verir ki, şikayət ərizəsində cinayət işinin düzgün araşdırılmadığı, Pərviz Abbasovun verilmiş ittihamlarla təqsirsiz olduğu qeyd olunub.

Sabiq baş həkimin vəkili Ali Məhkəməyə təqdim olunan ərizədə Pərviz Abbasova bəraət verilməsini istəyib.

Xatırladaq ki, "Yeni Klinika” Publik Hüquqi Şəxsin baş həkimi olmuş Pərviz Abbasov Baş Prokuror Yanında Korrupsiyaya qarşı Mübarizə İdarəsi tərəfindən həbs olunub. O, Cinayət Məcəlləsinin 311.3.2 (rüşvət alma təkrar törədildikdə) və 32.5, 311.3.2-ci (təkrar rüşvət almaya köməklik etmə) maddələri ilə təqsirli bilinərək Bakı Ağır Cinayətlər Məhkəməsinin hökmü ilə Pərviz Abbasov 8 il 6 ay azadlıqdan məhrum olunub.

Sonradan Bakı Apellyasiya Məhkəməsi Pərviz Abbasovun cəzasını 5 il 6 aya endirib.