Ukraynada əsir düşən azərbaycanlı tələbə GERİ QAYTARILDI

Ukraynada əsir düşən Azərbaycan vətəndaşı Əziz Haqverdiyev azad olunub.

BAKU.WS xəbər verir ki, bu barədə Bizim.Media-ya qardaşı Elçin Haqverdiyev məlumat verib.

Bildirib ki, qardaşının səhhətində ciddi problem yoxdur. Sadəcə Ukrayna dilini bilmədiyi üçün həmin ölkədə anlaşılmazlıq səbəbindən saxlanılıb:

“Qardaşım artıq yanımızdadır. Psixoloji cəhətdən bir qədər narahatlığı var. Ukraynada rus dilində təhsil alırdı deyə həmin ölkənin dilini bilmirdi. Problem də elə buna görə baş verib. Sağ olsun dövlətimiz, səfirliyimizin əməkdaşları qardaşımın ölkəyə gətirilməsi üçün əlindən gələni etdi”, - deyə Elçin Haqverdiyev qeyd edib.

Qeyd edək ki, Ukraynada təhsil alan və dövlət imtahanı üçün həmin ölkəyə gedən Əziz Bədirxan oğlu Haqverdiyevdən ailəsi sonuncu dəfə fevralın 21-də xəbər tutmuşdu.

Rusiya-Ukrayna arasında yaşanan gərginlik ucbatından bütün əlaqələr kəsilib. Ailə Ukraynada sosial şəbəkələrdə soydaşımızın saxlanma xəbəri yayıldıqdan sonra hadisədən xəbərdar olub. Bundan sonra Azərbaycanın aidiyyəti qurumları hərəkətə keçib və Əziz Haqverdiyev ölkəyə gətirilib.