Qaradağda sel aparmış körpünü əvəz edən müvəqqəti yol bərpa olunacaq

Bakının Qaradağ rayonunun Umbakı qəsəbəsində sel suları nəticəsində uçmuş körpünü əvəz edən müvəqqəti yol bərpa olunacaq.

BAKU.WS xəbər verir ki, bu barədə report-un sorğusuna cavab olaraq Azərbaycan Avtomobil Yolları Dövlət Agentliyindən (AAYDA) bildirilib.

Bildirilib ki, əvvəllər uçmuş körpünün yaxınlığında təşkil edilmiş müvəqqəti yol son günlərdə müşahidə olunan intensiv yağıntılar nəticəsində sel suları tərəfindən yararsız hala düşüb.

Hazırda vətəndaşların hərəkəti alternativ yol vasitəsilə təmin olunur və nəqliyyatın hərəkəti bu istiqamət üzrə təşkil edilib.

Hazırda suyun səviyyəsinin azalması gözlənilir. Su çəkildikdən dərhal sonra qeyd olunan müvəqqəti yolun bərpası istiqamətində müvafiq tədbirlər görüləcək.