Masallıda yanğının söndürülməsinə helikopterlər cəlb olunub - YENİLƏNİB/VİDEO

Fövqəladə Hallar Nazirliyinin “112” qaynar telefon xəttinə Masallı rayonunun Qəriblər kəndi yaxınlığında mürəkkəb relyefli dağlıq ərazidə yanğın baş verməsi barədə məlumat daxil olub.

Məlumatla əlaqədar dərhal FHN-in Dövlət Yanğından Mühafizə Xidmətinin yanğından mühafizə bölmələri çağırış üzrə cəlb olunub.

Yanğınsöndürmə işlərini sürətləndirmək və daha geniş əraziyə yayılmasının qarşısını almaq məqsədilə, yanğınla mübarizə tədbirlərinə əlavə olaraq FHN-in Mülki müdafiə qoşunları, Xüsusi Riskli Xilasetmə Xidməti, Cənub Regional Mərkəzinin müvafiq qüvvələri və Aviasiya dəstəsinin iki ədəd helikopteri cəlb olunub.

Hazırda yanğınsöndürmə işləri davam etdirilir.

***14.54

Masallı rayonunda meşəlik ərazidə yanğın baş verib.

Bu barədə BAKU.WS-in "qaynar xətti"nə məlumat daxil olub.

Yerli sakinlərdən birinin dediyinə görə, yanğın Masallı rayonunda yerləşən "İstisu" sanatoriyası yaxınlığında qeydə alınıb.

Hadisə ilə bağlı Fövqəladə Hallar Nazirliyindən BAKU.WS-ə bildirilib ki, Masallının Qəliblər kəndində açıq ərazidə seyrək ərazi yanır. Əraziyə FHN əməkdaşları cəlb olunub.