İtkin düşən 13 yaşlı qızın oxuduğu məktəbin direktoru: "Anası Aydanı nəzarətdə saxlayırdı"

Bakıda dünən itkin düşən Nəsimi rayonunda yerləşən 5 saylı orta məktəbin VII sinif şagirdi Aydan Əliyevanın axtarışları hələ də bir nəticə verməyib.Aydanın anası Təranə Yusifova BAKU.WS-ə açıqlamasında, Aydan itkin düşəndən bəri fasiləsiz olaraq qızını axtardığını deyir: "Dünəndən küçələrdə qızımı axtarıram. Hər kəsə yalvarıram, qızımı kim görübsə gecikmədən mənə xəbər versin. Aydan evdən çıxanda başında qırmızı rəngdə bandana vardı. Əynində yaşıl gödəkçə, ayağında ağ-qara krassovka, ağ rəngli köynək, tünd göy ətək, jaket və eyni rəngdə kalqotka geyinmişdi. Mən qızımı 1 saat nəzarətsiz qoymamışam. Bəlkə də belə davranmaqla səhv etmişəm".Məktəbin deirektoru Nərminə Gündüzlü BAKU.WS-ə açıqlamasında, Aydanın nümunəvi şagird olduğunu söylədi:"Çox yaxşı şagirddir. Oxumağı da, tərbiyəsi də. Qiymətləri 4-5 idi. Özünü heç vaxt qeyri-adekvat aparmayıb. Yəni risk qrupuna daxil uşaq deyildi. Özünə qapalı uşaq deyildi, ünsiyyətcil idi. Gülüb-danışan qız idi.Neçə ildir o məktəbdə işləyirəm, o ailə haqqında mənfi heç nə eşitməmişəm. Anası Aydanı nəzarətdə saxlayırdı, bütün valideyn iclaslarına gəlirdi. Uşağının hər addımı ilə maraqlanırdı.Uşaq itkin düşən kimi anasına mən məsləhət gördüm ki, polisə müraciət etsin".Qeyd edək ki, A.Əliyeva dünən 26 apreldə dərsləri bitdikdən sonra - saat 13.00 radələrində məktəbi tərk edib, lakin evə gedib çıxmayıb. Tanışları onu sonuncu dəfə 13.14-də Zərifə Əliyeva adına Göz Klinikasının yanında görüblər.Aydanın təhsil aldığı 5 saylı orta məktəb 4-cü mikrorayonda yerləşir. Özü isə anası ilə birlikdə 9-cu mikrorayonda yaşayır.Aydanın üstündə mobil telefon olmayıb. Ailəsi onu qohumların, rəfiqələrinin və ümumiyyətlə əlaqəsi olduğu hər bir kəsin evində axtarıblar, amma heç yerdə tapılmayıb.Valideynləri onun itkin düşməsilə bağlı polisə müraciət ediblər. Nəsimi rayon 19-cu Polis Bölməsindən BAKU.WS-ə bildirdilər ki, Aydan Əliyevanın axtarışları davam edir. Hələlik heç bir nəticə yoxdur.Aydanı görənlərdən DİN-nin 102 qaynar xəttinə və ya (55)207-81-11 nömrəsinə zəng edərək məlumat vermək xahiş olunur. Zülfiyyə Qurbanova