Hindistanda fillərin hücumu nəticəsində 2 nəfər ölüb

Hindistanın Kerala ştatında fillərin hücumuna məruz qalan bir qrupdan 2 nəfərin həyatını itirdiyi bildirilib.

BAKU.WS xəbər verir ki, "Hindustan Times" qəzetinin yaydığı məlumata görə, ştat rəsmiləri hadisə ilə bağlı açıqlama veriblər. Bildirilib ki, bir qrup şəxs səhər saatlarında bal toplamaq məqsədilə meşəyə yollanıb.

Onların orada fillərin hücumuna məruz qaldığı və heyvanların altında qalıb əzildikləri qeyd olunub. Nəticədə 2 nəfər hadisə yerində həyatını itirib.

Statistikaya görə, 2020–2024-cü illər arasında Hindistanda 1701 nəfər fillər tərəfindən öldürülüb.

Ümumdünya Təbiəti Mühafizə Fondunun (WWF) məlumatına əsasən, hər il təxminən yarım milyon ailə məhsullarına zərər vuran fillərin təsirinə məruz qalır.