Azərbaycanda tanınmış musiqiçi vəfat edib

Tanınmış musiqiçi və musiqiçi-pedaqoq, "Zirvə" vokal-instrumental ansamblının yaradıcılarından biri və solisti Taleh Yusubov vəfat edib.

BAKU.WS xəbər verir ki,tanınmış musiqiçi 75 yaşında Şəkidə dünyasını dəyişib.

Belə ki, o "Zirvə" vokal-instrumental ansamblının yaradıcılarından biri və solisti olub.

O, 7 iyul 1951-ci il tarixdə Nuxada (indiki Şəki) anadan olub. 1971 – 1973-cü illərdə, təhsil aldığı Politexnik İnstitutunun xalq çalğı alətləri ansamblında (ansambla bəstəkar, xalq artisti Nəriman Əzimovun rəhbərlik edirdi) royal ifaçısı olub, 1971-ci ildə Daşkənddə keçirilən "Taşpi-71" Ümumittifaq Festivalında, 1972-ci ildə isə SSRİ-nin 50 illiyinə həsr olunmuş Ümumittifaq Televiziya Festivalında çıxış edib.

1971-ci ildən əvvəl Şəki İpək kombinatının "Təbəssüm" estrada ansamblının, az sonra isə Şəki mədəniyyət evinin "Zirvə" vokal-instrumental ansamblının yaradıcılarından biri və üzvü,

1976-cı ilin yayından Rahib Məmmədovun Füzuli adına Şəki mədəniyyət və istirahət parkının nəzdində yeni yaratdığı estrada ansamblının üzvü olub. 2009-cu ilədək "Zirvə"nin solisti kimi fəaliyyət göstərib (ansambl 1978-cı ilin iyul ayında Moskvada SSRİ Xalq Təsərrüfatı Nailiyyətləri Sərgisində keçirilən Ümumittifaq Komsomolunun 60 illiyinə həsr olunmuş müsabiqədə 1-ci yeri tutub, dəfələrlə Azərbaycan Televiziyasında, Bakıda keçirilən Respublika əhəmiyyətli tədbirlərdə çıxışlar etmiş, Azərbaycanın bir çox şəhər və rayonlarında qastrol səfərlərində olub.