Abşeronda motosiklet piyadanı vurdu, sürücü hadisə yerində öldü

Abşeron rayonu ərazisində ağır yol-nəqliyyat hadisəsi baş verib. Motosiklet sürücüsü yolu keçmək istəyən piyadanı vurub.

BAKU.WS "Xəzər Xəbər"ə istinadla xəbər verir ki, hadisə Novxanı-Binəqədi yolunda qeydə alınıb.

Nəticədə piyada müxtəlif dərəcəli bədən xəsarətləri alaraq xəstəxanaya çatdırılıb. Motosikletin sürücüsü isə aldığı xəsarətlərdən hadisə yerindəcə ölüb.

Respublika Təcili və Təxirəsalınmaz Tibbi Yardım Mərkəzindən məlumat verilib ki, müvafiq çağırış əsasında təcili tibbi yardım briqadası ünvana cəlb olunub. Hadisə yerində 26 yaşlı şəxsə zəruri tibbi xidmət göstərilib və müxtəlif dərəcəli bədən xəsarətləri ilə Kliniki Tibbi Mərkəzə hospitalizasiya olunub.

Faktla bağlı araşdırma aparılır.