“Kimlərsə sosial şəbəkələrdə yazır ki, guya Türkiyədə mənim oğlumu oğurlayıblar və 5 milyonun müqabilində buraxılıb. Tamamilə yalan məlumatdır. Belə bir söhbət yoxdur”.
BAKU.WS xəbər verir ki, bunu Gununsesi.info-ya açıqlamasında Milli Məclisin deputatı Əhliman Əmiraslanov oğlunun Türkiyədə oğurlanması barədə iddialara münasibətində deyib. Onun sözlərinə görə, ölkədə olmadığından bu barədə yaxınlarından eşidib.
Xatırladaq ki, yayılan məlumata görə, Türkiyədə biznes şəbəkəsi olan deputat oğlu Azər Əmiraslanovun buraxılması üçün 10 milyon dollar tələb olunub. Danışıqların nəticəsi olaraq deputat oğlunun sərbəst buraxılması qarşılığında 5 milyon dollarından keçməli olub.
***16.05
Azərbaycan Tibb Universitetinin sabiq rektoru, Milli Məclisin Səhiyyə komitəsinin sədri Əhliman Əmiraslanovun köməkçisi Raqif Xəlilov Manset.az-a açıqlamasında deputatın oğlunun Türkiyədə oğurlanması ilə bağlı yayılan məlumatın həqiqətə uyğun olmadığını bildirib.
O qeyd edib ki, millət vəkilinin oğlu Azər Əmiraslanovun oğurlanması ilə bağlı yayılan xəbərlər doğru deyil.
***14:10
Türkiyədə azərbaycanlı deputatın oğlu oğurlanıb.
BAKU.WS Bakupost.az-a istinadla xəbər verir ki, oğurlanan şəxs Azərbaycan Tibb Universitetinin sabiq rektoru, Milli Məclisin Səhiyyə komitəsinin sədri Əhliman Əmiraslanovun oğlu Azər Əmiraslanovdur.
Saytın mənbəsi iddia edir ki, Azər Əmiraslanov Türkiyədə geniş biznes şəbəkəsinə sahibdir.
Onun bir neçə klinika və tibb sahəsi ilə bağlı biznes obyektləri var. A.Əmiraslanovun məhz geniş maliyyə imkanlarına görə maddi maraq üçün oğurlandığı bildirilib.
Məsələ ilə bağlı saytın deputat Əhliman Əmiraslanovla əlaqə yaratmaq cəhdi baş tutmayıb.
Deputatın köməkçisi Raqif Xəlilov isə məsələni araşdırıb məlumat verəcəyini desə də, sonradan Ə.Əmiraslanovla əlaqə saxlaya bilmədiyini qeyd edib: “Zəng etdim açmadı. Günün ikinci yarısı yenidən əlaqə saxlayacağam”.
Qeyd edək ki, mövzu ilə bağlı ilk məlumatı musavat.com yayıb.
Bildirilib ki, A.Əmiraslanov separatçı kürd qruplaşmanın üzvləri tərəfindən oğurlanıb və azadlığa buraxılması üçün öncə 10 milyon dollar tələb olunub. Danışıqlardan sonra deputatın oğlunun 5 milyon dollar qarşılığında sərbəst buraxıldığı və hazırda Bakıda olduğu vurğulanıb.