AMB-nin baş direktoru: “Rəqəmsal manatın tətbiqinə tələsmirik”

“Azərbaycan Mərkəzi Bankı (AMB) ölkədə rəqəmsal manatın tətbiqinə tələsmir”.

BAKU.WS xəbər verir ki, bunu “Report”a açıqlamasında AMB-nin Baş direktoru Fərid Osmanov bildirib.

“Beynəlxalq trendləri nəzərə alaraq, davamlı olaraq rəqəmsal valyuta ilə bağlı təhlillər aparırıq, amma onun tətbiqinə tələsmirik”, - deyə baş direktor qeyd edib.

Onun sözlərinə görə, təhlillər tam başa çatdıqdan sonra rəqəmsal manat barədə qərar verilə bilər:

“Çünki təhlil zamanı bir sıra istiqamətlər nəzərdən keçirilməlidir. Bunun həm monetar siyasətə, həm iqtisadiyyata təsiri, kibertəhlükəsizlik məsələləri qiymətləndirilməlidir. Bu işi AMB-nin komandası həm ayrıca, həm də beynəlxalq tərəfdaşlarla birgə həyata keçirir. Təhlillər tam yekunlaşandan sonra rəqəmsal manatın tətbiqi imkanları dəyərləndiriləcək. Yəni, hələ ki, AMB bu məsələdə qərarlı deyil”.