Sevgilisi ilə dalaşan oğlan havaya qalxmağa hazırlaşan təyyarənin qapısını açdı

Bostonun Loqan Beynəlxalq Hava Limanında qalxmağa hazırlaşan təyyarənin göyərtəsində olan sərnişinlərdən biri qəfildən çıxış qapısını açıb və dərhal digər sərnişinlər tərəfindən dayandırılıb.

BAKU.WS xəbər verir ki, bu barədə "Associated Press" yerli hakimiyyət orqanlarına istinadən məlumat verib.

Massaçusets ştatının polis sözçüsü Tim McGuirk çərşənbə axşamı axşam bildirib ki, JetBlue sərnişini ittiham olunacaq və çərşənbə günü məhkəmə qarşısına çıxarılacaq. Sərnişinin adı açıqlanmır.

"Qapı yerli vaxtla saat 19:30 radələrində "qəfil və xəbərdarlıq edilmədən" açılıb", - deyə McGuirk qeyd edib.

"Bostondan San Juana gedən JetBlue 161 reysində qanadın çıxış qapısı açılıb və bu, təcili yardım qapağının işə düşməsinə səbəb olub", - deyə aviaşirkətin açıqlamasında deyilir.

Hadisə şahidlərinin sözlərinə görə, hadisəni törədən şəxs sevgilisi ilə dava edirmiş.

"Sevgilisi ilə cib telefonu üstündə mübahisə edən oğlan sonra ayağa qalxıb koridordan aşağı qaçaraq qapıya tərəf getdi".

JetBlue bildirib ki, uçuş nəhayət başqa təyyarəyə yönləndirilib və San Juana enib.