"Şeremetyevo"dakı məhdudiyyətlər ləğv edildi

Rusiyanın "Şeremetyevo" hava limanında təyyarələrin qəbulu və buraxılması ilə bağlı tətbiq edilən məhdudiyyətlər aradan qaldırılıb.

Bu barədə Rusiya Federal Aviasiya Agentliyinin (Rosaviatsiya) nümayəndəsi Artyom Korenyako məlumat verib.

"Məhdudiyyətlərin qüvvədə olduğu dövrdə "Şeremetyevo"ya eniş etməli olan 18 təyyarə ehtiyat aerodromlara yönləndirilib", – deyə o, teleqram kanalında bildirib.

Korenyako əlavə edib ki, hava limanının bütün xidmətləri, aviadispetçerlər və heyətləri uçuşların təhlükəsizliyini təmin etmək üçün zəruri tədbirləri həyata keçiriblər.

Martın 11-də Ukrayna PUA-larının kütləvi hücumu fonunda "Domodedovo", "Vnukovo" və "Jukovski" hava limanlarında da məhdudiyyətlər tətbiq olunub.