Malayziyada qaz kəmərində partlayış olub - Böyük yanğın başlayıb

Malayziyada qaz kəmərinin partlaması nəticəsində azı 25 malayziyalı xəsarət alıb.

BAKU.WS xarici KİV-ə istinadən xəbər verir ki, hadisə Subanq Caya şəhərində səhər tezdən baş verib.

Məlumata görə, zərərçəkənlər yanıq xəsarətləri alıb, onlara həmçinin tüstüdən zəhərlənmə diaqnozu qoyulub.

İnternetdə yayımlanan kadrlardan görünür ki, partlayışdan sonra nəhəng alov sütunu səmaya qalxıb. Onun hündürlüyü 500 metrə çatıb. Alov yaxınlıqdakı evləri bürüyüb.

Yerli hakimiyyət orqanları boru kəmərini bağlamaq qərarına gəlib. Bu zaman boruda qalan qaz bitənə qədər yanğını söndürmək mümkün deyil. Hazırda yaxınlıqdakı evlərin sakinləri təxliyə edilir. Hadisə yerində 9 yanğınsöndürmə məntəqəsinin əməkdaşları işləyir.