Hörmüz boğazında gərginlik: Yüzlərlə gəmi keçid üçün icazə gözləyir

Yaxın Şərqdə artan hərbi-siyasi gərginlik Hörmüz boğazı ətrafında vəziyyəti daha da mürəkkəbləşdirib. Hazırda boğazın akvatoriyasında və ona bitişik sularda yüzlərlə gəmi toplanıb.

BAKU.WS xəbər verir ki, ümumilikdə 400-ə yaxın yük və müxtəlif təyinatlı gəmi boğazdan keçid üçün icazə gözləyir.

Bu gəmilərin bir qismi İranın nəzarətində olan adalar yaxınlığında lövbər salaraq vəziyyətin sabitləşməsini gözləyir.

Gərginliyin əsas səbəbi isə İran ilə ABŞ və İsrail arasında son dövrlərdə kəskinləşən qarşıdurmadır. Fevralın sonundan etibarən tərəflər arasında hərbi əməliyyatlar başlayıb, qarşılıqlı zərbələr endirilib və regionda təhlükəsizlik vəziyyəti ciddi şəkildə pisləşib.

Məhz bu fonda Tehran boğazdan keçid qaydalarını sərtləşdirib. İran rəsmiləri bildirir ki, ölkəyə qarşı əməliyyatlarda iştirak edən və ya onlara dəstək verən dövlətlərlə əlaqəli gəmilərin keçidi məhdudlaşdırılıb. Nəticədə bir sıra tanker və ticarət gəmiləri risk səbəbilə marşrutlarını dəyişmək və ya gözləmək məcburiyyətində qalıb.