Çində bir milyon il yaşı olan insan kəlləsi tapılıb

Çində bir milyon il yaşı olan insan kəlləsi tapılıb. Alimlər hesab edir ki, bu tapıntı Homo Sapiensin düşündüyümüzdən yarım milyon il əvvəl meydana çıxdığını göstərə bilər.

BAKU.WS xəbər verir ki, Fudan Universiteti və London Təbiət Tarixi Muzeyindən alimlərin iştirakı ilə aparılan araşdırma Science jurnalında dərc olunub. Professor Xijun Ni, nəticələrin onları heyrətləndirdiyini bildirib.

Tapılan "Yunxian 2" adlı kəllə əvvəlcə Homo Erectus sayılıb. Amma yeni analizlər bunun Homo Longi adlı insan növünün erkən forması olduğunu göstərib. Bu isə Neandertallar və Homo Sapienslə yanaşı yaşadıqlarına işarə edir.

Professor Chris Stringer bildirir ki, nəticələr böyük beyinli insanların tarixini ən azı yarım milyon il geri aparır. Onun sözlərinə görə, gələcəkdə daha qədim Homo Sapiens fosilləri də tapıla bilər.

Bəzi alimlər isə nəticələrin hələ dəqiq olmadığını deyir. Onlara görə, iddianı təsdiqləmək üçün daha çox fosil və genetik sübuta ehtiyac var.