Bu peyvənd bioloji yaşlanmanı ləngidə bilər

ABŞ-nin Cənubi Kaliforniya Universiteti (USC) tərəfindən aparılan yeni araşdırma zona peyvəndinin təkcə ağrılı dəri səpgilərinin qarşısını almaqla kifayətlənmədiyini, eyni zamanda orqanizmin bioloji yaşlanma prosesini də yavaşlada biləcəyini göstərib.

BAKU.WS xəbər verir ki, 2026-cı ilin yanvar ayında dərc olunan tədqiqat peyvəndlərin yalnız infeksiyalardan qorunma vasitəsi deyil, həm də sağlam yaşlanma strategiyalarının mühüm hissəsi ola biləcəyinə dair güclü sübutlar ortaya qoyur.

Alimlər 70 yaş və üzəri 3 min 800-dən çox iştirakçının məlumatlarını təhlil edərək bioloji yaşlanmanın yeddi fərqli göstəricisini araşdırıblar. Nəticələr zona peyvəndi vurduran şəxslərin peyvənd olunmayanlarla müqayisədə daha "gənc" bioloji profillərə malik olduğunu göstərib.

Peyvənd olunan iştirakçılarda yaşa bağlı xroniki iltihablanma - "inflammaging" səviyyəsinin əhəmiyyətli dərəcədə aşağı olduğu müəyyən edilib. Bundan əlavə, DNT üzərindəki molekulyar göstəricilərin və gen ifadə proseslərinin peyvəndlənmiş şəxslərdə daha yavaş yaşlandığı müşahidə olunub.

Müsbət təsirlərin peyvənddən sonrakı ilk üç il ərzində daha qabarıq olduğu, lakin dörd il və sonrasında da davam etdiyi bildirilib.

Araşdırmanın müəlliflərindən olan gerontoloq Jung Ki Kimin sözlərinə görə, bu təsirin səbəbi peyvəndin suçiçəyi virusunun (varicella-zoster) sinir sistemində vaxtaşırı aktivləşməsinin qarşısını alması ola bilər.

Virus hər dəfə aktivləşməyə cəhd etdikdə orqanizmdə stress və iltihab reaksiyası yaranır. Zona peyvəndi bu prosesi basdıraraq bioloji stress yükünü azalda bilər.

Bu araşdırma zona peyvəndinin demans riskini təxminən 20 faiz azaltdığını göstərən 2025-ci il tədqiqatlarının nəticələrini də təsdiqləyir.

Alimlər hesab edirlər ki, peyvənd immun sistemini "təlimləndirərək" onu təkcə viruslara qarşı deyil, həm də yaşlanma ilə bağlı digər hüceyrə zədələnmələrinə qarşı daha effektiv mübarizəyə hazırlayır.