ABŞ-yə köçmək istəyənlərin nəzərinə: Qanunsuz hesab edilən VİZA QADAĞASI ləğv olundu

ABŞ məhkəməsi Azərbaycan da daxil olmaqla, 75 ölkə vətəndaşlarına immiqrasiya vizalarının verilməsinin dayandırılmasını ləğv edib

ABŞ-nin Federal Məhkəməsi Tramp administrasiyasının 75 ölkədən olan müraciətçilərə immiqrasiya vizalarının verilməsinin dayandırılması barədə qərarını qanunsuz hesab edib. Məhdudiyyətlər Azərbaycan vətəndaşlarına da şamil edilirdi.

BAKU.WS Oxu.Az-a istinadən xəbər verir ki, Manhetten dairə məhkəməsinin hakimi Dövlət Departamentinin siyasətini "açıq-aşkar qanunsuz" adlandırıb.

Onun fikrincə, dövlət katibi Marko Rubio yalnız müraciət edənlərin vətəndaşlığı əsasında viza verilməsini qadağan etməklə öz səlahiyyətlərini aşıb.

Hakim qeyd edib ki, qanunvericilik dövlət katibinə konsulluq əməkdaşlarının işinə bu cür müdaxilə etməyə imkan vermir. Ayrı-ayrı dövlətlərin vətəndaşları üçün tam qadağa ərizələrə baxılmasının qanuni proseduruna birbaşa ziddir.

Dövlət Departamenti məhdudiyyətləri yanvar ayında tətbiq etmişdi. Səlahiyyətlilər iddia edirdilər ki, siyahıya daxil edilmiş ölkələrdən olan şəxslərin dövlət üçün maliyyə yükünə çevrilməsi və ABŞ-də sosial yardımdan yararlanması ehtimalı çox yüksəkdir.

Məhdudiyyətin Rusiya, eləcə də Latın Amerikası, Balkan, Cənubi Asiya, Afrika, Yaxın Şərq və Karib hövzəsi ölkələrindən olan müraciətçilərə də təsiri vardı. O, yalnız ABŞ-yə daimi köçmək üçün nəzərdə tutulmuş immiqrasiya vizalarına aid idi və turist vizalarına, eləcə də digər müvəqqəti vizalara şamil edilmirdi.