ABŞ və İran arasında baş tutacaq danışıqların bəzi detalları açıqlandı

ABŞ və İran arasında danışıqlar İslamabadda şənbə günü başlayacaq və bir neçə gün davam edəcək.

BAKU.WS xəbər verir ki, bu barədə "TASS" agentliyi məlumat yayıb.

Qeyd edilib ki, görüş qapalı keçiriləcək. Danışıqlar üçün isə ən çox ehtimal olunan məkan "Serena" otelidir.

Daha əvvəl otel işçilərindən biri "TASS"a bildirib ki, otel ABŞ və İran nümayəndə heyətlərini qəbul etməyə hazırlaşır.

Məsləhətləşmələrdən sonra mətbuat konfransı gözlənilir.

ABŞ və İranın Pakistandakı səfirlikləri "TASS"ın İslamabadda keçiriləcək danışıqlara hazırlıqla bağlı təfərrüatlar barədə şərh vermək istəyinə cavab verməyiblər.

Danışıqlarla əlaqədar olaraq şəhərdə təhlükəsizlik tədbirləri gücləndirilib.

Hakimiyyət orqanlarının məlumatına görə, bu tədbirlər xarici nümayəndə heyətlərinin təhlükəsiz hərəkətini təmin etmək üçün nəzərdə tutulub.

Hökumət kompleksinin və ona bitişik ərazilərin yerləşdiyi qırmızı zona xüsusi nəqliyyat vasitələri istisna olmaqla, bütün nəqliyyat növləri üçün tamamilə bağlıdır.

Danışıqlarla əlaqədar olaraq 9 və 10 aprel paytaxtda rəsmi tətil elan edilib.

Şəhər administrasiyasının bildirişinə əsasən, hüquq-mühafizə orqanları, tibb müəssisələri və kommunal xidmətlər adi qaydada fəaliyyət göstərməyə davam edəcək.

İslamabad sakinlərinə iş qrafiklərini buna uyğun planlaşdırmaları tövsiyə olunur.

Xatırladaq ki, aprelin 7-də ABŞ prezidenti Donald Tramp İranla iki həftəlik qarşılıqlı atəşkəs elan edib.

Onun sözlərinə görə, tərəflər demək olar ki, bütün mübahisəli məsələləri həll ediblər və Vaşinqton Tehranın 10 bəndlik təklifini gələcək danışıqlar üçün işlək əsas kimi görür. Bunlara təcavüz etməmək prinsipinə riayət etmək, İranın Hörmüz boğazına nəzarəti, ölkə daxilində uran zənginləşdirilməsi, ilkin və ikinci dərəcəli sanksiyaların ləğvi, kompensasiyanın ödənilməsi və ABŞ qüvvələrinin bölgədən çıxarılması daxildir.

Tramp qərarın İranın Hörmüz boğazını açmaq istəyinə əsasən verildiyini bildirib. Öz növbəsində, Tehran İrana qarşı heç bir hücum edilməməsi şərti ilə "müdafiə hücumlarını" dayandırmağa razılaşıb. Tərəflər arasında vasitəçilik edən Pakistanın Baş naziri Şehbaz Şərif olub. O hər iki tərəfi 10 apreldə keçiriləcək danışıqlara dəvət edib.