14 Çin təyyarəsi və 5 hərbi gəmi Tayvan yaxınlığında görünüb

Tayvan silahlı qüvvələri Çin Xalq Azadlıq Ordusunun (PLA) 14 təyyarəsinin və Çin Hərbi Dəniz Qüvvələrinin (PLAN) 5 gəmisinin ada yaxınlaşdığını qeydə alıb.

BAKU.WS xəbər verir ki, bu barədə Tayvanın Milli Müdafiə Nazirliyi məlumat yayıb.

Məlumatda 12 təyyarənin Tayvan boğazındakı orta xətti keçərək Tayvanın şimal, cənub-qərb və şərq Hava Hücumundan Müdafiə Eyniləşdirmə Zonalarına (ADIZ) daxil olduğu qeyd olunub. Tayvanın Milli Müdafiə Nazirliyi vəziyyətin izlənildiyini və lazımi tədbirlərin görüldüyünü açıqlayıb.

Nazirliyin sosial şəbəkədəki açıqlamasında qeyd olunur:

"Bu gün saat 6:00-a qədər (UTC+8) Tayvan ətrafında 14 PLA təyyarəsi və 5 PLAN gəmisi qeydə alınıb. 12 təyyarə orta xətti keçərək şimal, cənub-qərb və şərq ADIZ-lərinə daxil olub. Vəziyyət izlənilib və müvafiq tədbirlər görülüb.

Tayvan 1949-cu ildən bəri öz inzibati idarəçiliyi altında idarə olunur. Bu, Çin Vətəndaş Müharibəsində məğlub olan Çan Kay-Şi (1887-1975) liderliyindəki Kuomintang qüvvələrinin adaya qaçmasından sonra baş verib. Pekin Tayvanı Çin Xalq Respublikasının bir əyaləti hesab edir.