Ürək və damarlar üçün ən faydalı giləmeyvə bu imiş

ABŞ-nin Men Universitetinin alimləri ürək-damar sistemi, qan dövranı və damar sağlamlığı üçün ən faydalı giləmeyvəni müəyyən ediblər.

BAKU.WS xəbər verir ki, 24 il davam edən araşdırmanın nəticələri "Fox News" telekanalında yayımlanıb.

Tədqiqatın həmmüəllifi Doroti Klimis-Zakas bildirib ki, bu, giləmeyvə yabanı (dikdə bitən) qaragilədir.

"Ənənəvi tibb onun faydasını artıq qəbul edir. Müasir elmi araşdırmalar isə yabanı qaragilənin unikal tərkibinin balanslı qidalanma çərçivəsində qəbul edildikdə sağlamlığın möhkəmlənməsinə necə töhfə verdiyini öyrənməyə davam edir", – deyə Klimis-Zakas qeyd edib.

Onun sözlərinə görə, araşdırma zamanı iştirakçılarda arterial təzyiqin, qandakı lipidlərin və şəkər səviyyəsinin normallaşması müşahidə olunub. Bu da ürək-damar sisteminə müsbət təsir göstərib.

Klimis-Zakas əlavə edib ki, giləmeyvənin tərkibində olan bəzi birləşmələr dərhal sorulmur. Onlar əvvəlcə bağırsağa düşür, burada mikroorqanizmlərin köməyi ilə qan dövranına daxil ola bilən maddələrə çevrilir.

Araşdırmada iştirak etməsə də, nəticələrlə tanış olan Nyu-Yorklu həkim-diyetoloq Nikolet Pейс bildirib ki, əsas nəticə yabanı giləmeyvələrə və mövsümi meyvələrə üstünlük verilməsinin daha faydalı olmasıdır, lakin təhlükəsizlik qaydalarına əməl etmək vacibdir.

"Onlar çox vaxt mədəni şəkildə yetişdirilən sortlardan daha qidalı olur və ürək-damar sistemi ilə yanaşı bağırsaq sağlamlığına da güclü müsbət təsir göstərə bilir", – deyə həkim vurğulayıb.

Peysin sözlərinə görə, qida rasionuna qara mürver, qara qarağat, meşə mərcanı (klyukva) və tut da əlavə etmək tövsiyə olunur. Bu giləmeyvələr polifenollar və antioksidantlarla zəngindir.