Süni intellekt fərdi turizmi necə dəyişəcək? - Gələcəyin səyahət modeli açıqlanıb

Fərdi turizm dünyada sürətlə populyarlaşır və yaxın illərdə səyahət planlamasının böyük hissəsi süni intellektin (Sİ) öhdəsinə keçə bilər.

BAKU.WS xəbər verir ki, mütəxəssislərin fikrincə, əsas trend "agent əsaslı" süni intellekt sistemlərinin inkişafı olacaq.

Bu tip rəqəmsal köməkçilər sadəcə tövsiyə verməklə kifayətlənməyəcək, eyni zamanda istifadəçi əvəzinə konkret addımlar atacaq. Sistem real vaxt rejimində aviabiletləri və qatar biletlərini axtarıb bron edəcək, otel seçəcək, endirimləri tətbiq edəcək və hətta gizli xərcləri də nəzərə alacaq. Beləliklə, istifadəçi bütün prosesi əl ilə idarə etmək məcburiyyətində qalmayacaq.

Digər mühüm istiqamət isə omni-kanal inteqrasiyadır. Gələcəkdə səyahət xidmətləri vahid süni intellekt platformasında birləşəcək. İstifadəçi bir pəncərədə bilet ala, hotel bron edə, ekskursiya sifariş verə və dəstək xidməti ilə əlaqə saxlaya biləcək.

Axtarış vərdişləri də dəyişəcək. İnsanlar klassik axtarış sistemləri əvəzinə süni intellekt əsaslı cavablara üstünlük verəcək. Bu sistemlər qısa, strukturlaşdırılmış və konkret məlumat təqdim edəcək. Eyni zamanda bütün səyahət məlumatları bir platformada saxlanılacaq.

Ekspertlər bildirirlər ki, hiperfərdiləşdirmə növbəti mərhələ olacaq. Süni intellekt zamanla istifadəçinin seçimlərini yadda saxlayacaq və əlavə izaha ehtiyac olmadan uyğun variantlar təklif edəcək. Hətta marşrutlar real vaxtda yenilənəcək – hava şəraiti, küçə bağlanmaları və ya hava limanındakı sıxlıq nəzərə alınaraq alternativlər avtomatik təqdim ediləcək.

Bundan başqa, nəqliyyat və hotel sektorunda biometrik texnologiyaların tətbiqi sənədləşmə prosesini sürətləndirəcək və gözləmə müddətini azaldacaq.

Beləliklə, yaxın gələcəkdə süni intellekt fərdi turizmi daha sürətli, rahat və tam avtomatlaşdırılmış təcrübəyə çevirə bilər.