Həkimdən XƏBƏRDARLIQ: Kondisionerdən səhv istifadə edilməsi ciddi xəstəliklərə səbəb ola bilər

Yay aylarında kondisionerlər insanların isti havadan qorunması üçün ən çox istifadə olunan vasitələrdən biridir. Lakin mütəxəssislər xəbərdarlıq edirlər ki, bu cihazlardan düzgün istifadə olunmaması sağlamlıq üçün ciddi təhlükələr yarada bilər.

BAKU.WS Rusiya mətbuatına istinadən xəbər verir ki, həkim Denis Prokofyevin sözlərinə görə, əsas risk soyuq havanın özündən deyil, insan orqanizminin kəskin temperatur fərqlərinə məruz qalmasından qaynaqlanır.

Həkim bildirib ki, isti havadan birbaşa güclü və soyuq hava axınının altına düşmək əzələlərin spazmına səbəb ola bilər. Bu isə boyun, onurğa və döş qəfəsi nahiyəsində ağrılarla müşayiət olunan müxtəlif problemlərin yaranmasına gətirib çıxarır.

Mütəxəssis qeyd edib ki, kondisionerin yaratdığı soyuqluq bəzi hallarda üz və üçlü sinirin iltihabına da səbəb ola bilər. Onun sözlərinə görə, belə xəstəliklərin müalicəsi uzunmüddətli və ağrılı prosesdir.

Prokofyev vurğulayıb ki, həddindən artıq soyuma immun sisteminə də mənfi təsir göstərir. Nəticədə orqanizm virus və infeksiyalara qarşı daha həssas olur.

Həkimin diqqət çəkdiyi digər mühüm məqam isə kondisionerlərin texniki baxımı ilə bağlıdır. O bildirib ki, vaxtında təmizlənməyən və qulluq göstərilməyən sistemlərdə kif göbələkləri çoxala bilər. Bu mikroorqanizmlər cihaz işə salındıqda havaya yayılır və tənəffüs yollarına düşərək ciddi ağciyər xəstəliklərinə səbəb ola bilər.

Mütəxəssis mümkün olduqda otaqların təbii şəkildə havalandırılmasını və havanın nəmləndirilməsini tövsiyə edir. Kondisionerdən istifadə zəruridirsə, otaqla küçə arasındakı temperatur fərqinin 10 dərəcədən artıq olmaması məsləhət görülür.

Həkimin sözlərinə görə, sağlamlıq baxımından ən təhlükəsiz temperatur rejimi təxminən 23 dərəcə hesab olunur.