Əgər uşaqlarınızda bu əlamətlər varsa... - Valideynlərə XƏBƏRDARLIQ

"DEHB (Diqqət Əskikliyi və Hiperaktivlik Pozuntusu) olan uşaqlarda nitq və ünsiyyət problemləri geniş yayılmışdır".

Bununla bağlı defektoloq-loqoped Fatimə Məmmədova BAKU.WS-ə açıqlamasında bildirib. Onun sözlərinə görə, bu uşaqlar danışarkən fikirlərini ardıcıl ifadə etməkdə çətinlik çəkir.

"Bu uşaqlar cümlələri yarımçıq saxlayır. Tez-tez mövzu dəyişir və qarşı tərəfi dinləməkdə çətinlik yaşayırlar. Söz ehtiyatı kifayət qədər olsa belə, diqqətin tez yayınması səbəbindən nitq səliqəsiz və anlaşılmaz ola bilər", - deyə mütəxəssis bildirib.

Fatimə Məmmədova deyir ki, hiperaktivlik və impulsivlik uşağın danışıq tempinə təsir edir:

"Nitqdə tələskənlik, söz udma və səslərin təhrif olunması müşahidə edilir. DEHB-li uşaqlarda loqopedik dəstək nitqin strukturlaşdırılması, dinləmə bacarığının inkişafı və ünsiyyətin gücləndirilməsi baxımından çox önəmlidir. Erkən müdaxilə uşağın həm nitq, həm də sosial bacarıqlarının daha sağlam inkişafına kömək edir".