Əcdadlarımız ətyeyən olmayıblarmış

Qədim əcdadlarımız müntəzəm olaraq ət yeməyiblər.

BAKU.WS "Science" jurnalında dərc olunan tədqiqata əsasən xəbər verir ki, ikiayaqlı primatların əsasən bitki mənşəli qidalarla qidalandığı müəyyən edilib. Bu nəticə Australopithecus africanus növünə aid dişlərin kimyəvi tərkibinin təhlili əsasında əldə olunub.

Almaniyanın Mayns şəhərində yerləşən Maks Plank Kimya İnstitutunun geokimya mütəxəssisi Tina Lyudeke və həmkarları, Cənubi Afrikada Sterkfonteyn mağaralarından tapılmış təxminən 3,5 milyon illik fosilləşmiş diş nümunələrini tədqiq ediblər. 43 qədim məməli heyvanın dişlərinin azot nisbətini A. africanus növünə aid nümunələrlə müqayisə edən alimlər belə qənaətə gəliblər ki, bu növün qidalanması çoxşaxəli olsa da, əsasən məməlilərin ətindən ibarət deyildi.

Alimlərin qeyd etdiklərinə görə, bu nəticələr A. africanus növünün ət yemədiyini tam istisna etmir. Həmçinin, primatların termitlər kimi azot nisbəti aşağı olan qidalar yeyə biləcəyi də ehtimal olunur. Bu isə onların qida rasionunun tamamilə bitki mənşəli olmadığını göstərir.