BAKU.WS-in 21 yaşı tamam oldu!

Bu gün - 5 yanvar BAKU.WS saytının fəaliyyətə başlamasından 21 il ötür!

BAKU.WS yarandığı ilk günlərdən məhdud kollektiv və imkanlarla ölkənin internet resursları arasında öz sözünü deməyi bacarıb. Peşəkarlıq və operativlik yarandığı ilk günlərdən BAKU.WS-ə populyarlıq qazandırıb.

Bu gün saytımız Azərbaycan və rus dillərində fəaliyyət göstərən ən oxunaqlı, operativ və etibarlı xəbər istehsalçılarından biridir. BAKU.WS-də Azərbaycanın siyasi, iqtisadi, sosial, mədəni və idman həyatına dair xəbər, analitik yazı, reportaj, müsahibə və araşdırmalar, eyni zamanda regionda və dünyada baş verən ən son xəbərləri izləmək mümkündür.

Daim eksklüziv xəbərlərlə oxucuların rəğbətini və etimadını qazanan BAKU.WS 21 il ərzində Azərbaycan seqmentində etibarlı xəbər resurslarından birinə çevrilərək statusunu bu günədək qoruyub saxlayır.

Vətən müharibəsində jurnalistikamızın üzərinə çətin bir vəzifə götürdüyü bir dövrdə BAKU.WS komandası olaraq bu öhdəliyi də şərəf və ləyaqətlə yerinə yetirməyə çalışdıq. Dezinformasiyaların çox yayıldığı həmin çətin dövrdə rəsmi qurumlarla birgə əməkdaşlıq edərək, oxuculara cəbhədən ən dolğun və son məlumatları çatdıraraq qələbələrimizi fərəhlə işıqlandırdıq.

BAKU.WS Bakıda keçirilmiş BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasını (COP29) da geniş şəkildə işıqlandırmışdır. BAKU.WS-in COP29 İqlim Dəyişiklikləri Konfransındakı fəaliyyəti Azərbaycan Respublikasının Prezidenti cənab İlham Əliyev tərəfindən yüksək qiymətləndirilib və əməkdaşlar təşəkkürnamə ilə təltif olunublar.

BAKU.WS Azərbaycanın "Instagram" seqmentində də öz sözünü demiş, ən oxunaqlı və etibarlı səhifə adını qazanıb. BAKU.WS-in "Instagram" səhifəsinin izləyicilərinin sayı artaraq 1,3 milyonu ötüb. Səhifənin ay ərzində paylaşımları 200 milyona yaxın baxış toplayıb. Postlar cəmi 1 ay ərzində 3,4 milyon unikal istifadəçisiyə çatıb. Ay ərzində 2,4 milyon izləyici səhifəmizi ziyarət edərək xəbərləri izləyir. Bu rəqəmlər "Instagram"da BAKU.WS xəbər səhifəsinə olan inamın və etibarın göstəricisidir.

Azərbaycanda təşkil olunan xeyriyyə aksiyaları saytın daima diqqətində olub. BAKU.WS olaraq 21 il ərzində bir çox xeyriyyə aksiyalarında qatılmış, ehtiyaclı və aztəminatlı insanlara dəstək olmuş və onların problemlərinin həllində yaxından iştirak etmişik.

BAKU.WS 21 il ərzində bir çox mükafat qazanıb, populyarlaşıb və Azərbaycanın aparıcı kütləvi informasiya vasitələrindən birinə çevrilib. Bizi seçən oxucularımızın etimadını doğrultmaq üçün BAKU.WS komandası olaraq bundan sonra da səylə çalışmağa davam edəcəyik.