Alimlər müəyyən ediblər: çay və qəhvə nə vaxt xərçəng riskini artırır

Çinli alimlər müəyyən ediblər ki, gündə səkkizdən çox fincan çox isti çay və ya qəhvə içmək mədə xərçəngi riskini əhəmiyyətli dərəcədə artırır.

Araşdırma göstərib ki, təhlükə təkcə içkilərin miqdarı ilə deyil, onların temperaturu ilə də bağlıdır.

BAKU.WS-in Food & Function jurnalına istinadla verdiyi xəbərə görə, nəticələr Çin Paytaxt Tibb Universitetinin mütəxəssisləri tərəfindən UK Biobank layihəsinin genişmiqyaslı məlumatları əsasında əldə edilib.

Tədqiqatda 328 mindən çox insan iştirak edib, onların sağlamlıq vəziyyəti təxminən 12 il ərzində izlənilib. Alimlər həm çay və qəhvə istehlakının miqdarını, həm də onların temperaturunu - ilıqdan çox istiyədək - təhlil ediblər.

Nəticələr göstərib ki, gündə səkkizdən çox fincan isti içki içənlərdə mədə xərçəngi riski bu vərdişi olmayan və ya içkiləri orta temperaturda qəbul edən insanlara nisbətən 54% daha yüksək olub.

Xüsusilə çox isti çay və ya qəhvə sevənlərdə eyni miqdarda içki istehlakı zamanı xəstəliyə tutulma ehtimalı iki dəfədən çox artıb.

Maraqlıdır ki, bu əlaqə yaş, həyat tərzi, siqaret çəkmə və digər risk faktorları nəzərə alındıqdan sonra da qalmaqda davam edib.

Alimlərin fikrincə, bunun səbəbi mədə selikli qişasının istiliklə davamlı qıcıqlanması ola bilər ki, bu da iltihaba və toxuma zədələnməsinə gətirib çıxarır.

Tədqiqatçılar vurğulayıblar ki, nəticələr sadə bir profilaktik tədbiri göstərir: xüsusilə içkiləri çox və müntəzəm qəbul edən insanlar çay və qəhvəni içməzdən əvvəl bir qədər soyutmalıdırlar.