Rafael Ağayev niyə Premyer Liqaya yollanmayıb?

Azərbaycanın tanınmış karateçisi Rafael Ağayevin Birləşmiş Ərəb Əmirliklərinin Fuceyrə şəhərindəki Premyer Liqa turnirində iştirak etməməsinin səbəbi açıqlanıb.

BAKU.WS-in məlumatına görə, bu barədə “Report”a Azərbaycan Milli Karate Federasiyasının prezidenti Yaşar Bəşirov bildirib.

Federasiyası rəhbəri 5 qat dünya və 11 qat Avropa çempionunun öz istəyi ilə yarışa yollanmadığını bildirib: “Rafael Ağayev komandamızın üzvüdür. Zədə olmasa, bu il Avropa çempionatında və İslam Həmrəyliyi Oyunlarında iştirakı planlaşdırılır. O bildirdi ki, Premyer Liqa turnirinin onun üçün böyük əhəmiyyəti yoxdur, həm də tam hazır deyil. Ağayevin yüngül zədəsi də var”.

Qeyd edək ki, Rafael Ağayev 2021-ci ildə keçirilmiş Tokio Yay Olimpiya Oyunlarında 75 kq çəki dərəcəsində gümüş medal qazanıb.