Dünya çempionatı: Azərbaycan millisi komandalararası yarışa qələbə ilə başlayıb

Yeniyetmə cüdoçulardan ibarət Azərbaycan millisi Xorvatiyada keçirilən dünya çempionatında komandalararası yarışa qələbə ilə start verib.

"Report"un Zaqrebə ezam olunmuş əməkdaşı xəbər verir ki, yığma 1/8 finalda Yunanıstana qalib gəlib - 4:1.

Milli növbəti mərhələdə Qazaxıstan - Çin Taypeyi cütünün güclüsü ilə görüşəcək.

Qeyd edək ki, Azərbaycan seçməsi fərdi mübarizəni medal sıralamasında birinci pillədə başa vurub. Nihad Məmişov (50 kq), Xədicə Qədəşova (52 kq) qızıl, Məhəmməd Məmişov (50 kq), Məhəmməd Musayev (60 kq), Əbil Yusubov (66 kq) gümüş, Mirxaliq İskəndərov (55 kq), Süleyman Şükürov (73 kq) və Ramazan Əhmədov (90+) isə bürünc medal əldə ediblər.