055 213 76 73
"Bu medalı qazanmaq mənim arzum idi. Birinci yeri tutdum və himnimizi səsləndirdim".
BAKU.WS xəbər verir ki, bunu Çexiyanın paytaxtı Praqada gənclər arasında keçirilən Avropa çempionatında qızıl medal qazanan Azərbaycan cüdoçusu Elcan Hacıyev "Report"a açıqlamasında deyib.
81 kq çəki dərəcəsində fəxri kürsünün ən yüksək pilləsinə qalxan idmançı qitə çempionatının əhəmiyyətinin çox böyük olduğunu bildirib:
"Səhvlərimin üzərində işlədim və qızıl medal əldə etdim. Ölkəmizin çətin günündə bu nailiyyəti şəhidlərimizə həsr edirəm. Ruhları şad olsun".
Hacıyev məqsədinin 2024-cü ildə Fransanın paytaxtı Parisdə keçiriləcək Yay Olimpiya Oyunlarında iştirak etmək olduğunu bildirib:
"Qarşıda Böyük Dəbilqə turnirləri var. O vaxtadək xallar yığmalıyam. Olimpiadaya gedəcəyimə inanıram".
Cüdoçu yarışın onun üçün rahat keçdiyini sözlərinə əlavə edib: "Asan yarış yoxdur. Hər idmançı ölkəsinin himnini səsləndirmək istəyir.
Mənim əziyyətim yerdə qalmadı və çempion oldum. Bundan sonra daha yaxşı nəticələr qazanacağam. Əvvəl də Avropa çempionatlarında güləşmişəm, lakin medal qazana bilməmişdim".
İdmançı 81 kq-da çıxış edən Səid Mollayi ilə rəqabətə hazır olduğunu söyləyib: "Onu qabaqlayacağıma inamım böyükdür. Ümid edirəm ki, onu keçərək olimpiadaya özüm gedəcəyəm. Məşqlərdə üz-üzə gəlmişik. Hər ikimiz qalib gəlmişik. Amma əsas məşq deyil, yarışdır".
Avropa çempionu Özbəkistanın paytaxtı Daşkənddə keçiriləcək böyük arasında dünya çempionatına qatılmaq istədiyini diqqətə çatdırıb:
"Yekun qərarı baş məşqçi verəcək. İstəsələr, güləşməyə hazıram və özümə də inanıram. Olmasa, Birləşmiş Ərəb Əmirliklərinin paytaxtı Abu-Dabidəki və Bakıda Böyük Dəbilqəyə hazırlaşacağam".
Hacıyev son olaraq 73 kq-da komanda yoldaşı Vüsal Qələndərzadənin də qızıl medal qazanmasına toxunub: "Vüsal 2004-cü ildəndir və onun gələcəyi var. Qarşıda daha yaxşı nailiyyətlər əldə edəcək. Onun qızıl medalı mənə əlavə stimul verdi".