İki gün əvvəl çəkilən yol niyə qazılıb? - FOTO

Paytaxtın yenicə təmir olunan Ceyhun Səlimov küçəsinin bir hissəsində yenidən qazıntı aparılıb. Bu barədə sosial şəbəkələrdə görüntülər paylaşılıb.

Azərbaycan Avtomobil Yolları Dövlət Agentliyindən Trend-ə bildirilib ki, sözügedən ərazidə yolun altından keçən elektrik xəttində qəza baş verib: "Təəssüf ki, küçənin yan yolunda hərəkət hissənin qazılması məcburiyyəti yaranıb. Hazırda aidiyyəti qurum tərəfindən qəza aradan qaldırılır".

"Azərenerji" ASC-dən isə Trend-ə bildirilib ki, işlər 2-3 saata yekunlaşacaq.

Qeyd edək ki, Ceyhun Səlimov küçəsinin 3-cü mikrorayon dairəsindən Əbdülvahab Salamzadə küçəsinin kəsişməsinədək olan 565 metr uzunluğa malik hissəsində təmir işləri 2 gün əvvəl başa çatdırılmışdı.