Belarus kömək üçün Rusiya Federasiyasına müraciət etdi

Belarus rəhbərliyi Rusiyadan koronavirus pandemiyasına qarşı mübarizədə yardım istəyib.

BAKU.WS xəbər verir ki, bu barədə "Kommersant" qəzeti yazıb.

Nəşrin yazdığına əsasən, Minsk diplomatik kanallar vasitəsi ilə Moskvaya rəsmi sorğular göndərərək koronavirus pandemiyası ilə mübarizə aparmaq üçün test avadanlıqları, tibbi maskalar və mexaniki havalandırma cihazları verməsini xahiş edib.

Qeyd edək ki, SARS-CoV-2 koronavirusunun səbəb olduğu COVID-19 infeksiyası Çində dekabr ayında başlayıb. Mart ayında Ümumdünya Səhiyyə Təşkilatı (ÜST) koronavirusu pandemiya elan edib.

Belarusun Səhiyyə Nazirliyinin məlumatına görə, ölkədə 163 xəstə müəyyən edilib. Dünən prezident Aleksandr Lukaşenko koronavirus infeksiyasına yoluxan ilk şəxsin öldüyünü açıqlayıb.

Belarus hələ də COVID-19-un yayılmasına qarşı sərt tədbirlər görməyib - sərhədləri açıqdır, təhsil müəssisələri, kinoteatrlar, ticarət mərkəzləri və restoranlar adi şəraitdə işləyir.