Məhəmmədi kəndinin sakinləri sosial problemlərdən əziyyət çəkirlər. Sakinlər bildirirlər ki, məsələ ilə bağlı dəfələrlə müvafiq qurumlara şikayət edib, cavab ala bilməyincə məsələni ictimailəşdirmək məcburiyyətində qalıblar.

BAKU.WS musavat.com-a istinadən xəbər verir ki, kəndin Sabunçu rayonunun Zabrat qəsəbəsi ilə sərhəd yaşayış məntəqəsində məskunlaşan sakinləri söyləyirlər ki, şəhərə gəlməyə yol tapa bilmirlər:

"Bizim əsas gediş-gəliş yolumuz Zabrat qəsəbəsi istiqamətinədir. Lakin yolsuzluq olduğu üçün hərəkət edə bilmirik. Ərazidə kanalizasiya sistemi yoxdur, yollar isə bərbad olduğundan hər tərəf çirkab suyun içərisində qalır. Öz hesabımıza dəfələrlə çınqıl tökdürüb, yol çəkdirmişik. Lakin bu yollar da suyun altında qalıb, dağılıb. Yol probleminə görə təcili tibbi yardım maşınları belə çağırışa gəlməkdən imtina edirlər. Eyni zamanda ərazidə avtobus marşrutu da işləmir, taksilər də yola görə gəlməkdən imtina edirlər. Kanalizasiya ilə bağlı vəziyyət daha acınacaqlıdır. Bütün çirkab sular yaxınlıqdakı kiçik göllərə axıdılır.

Yaxınlıqda zibil qutuları olmadığı üçün zibillər də həmin göllərin kənarına tökülür. İstilər düşdükdən sonra həmin ərazi əsl xəstəlik mənbəyinə çevriləcək".

Sakinlər Məhəmmədi kəndinin adı çəkilən ərazisində telefon və internet rabitəsinin də olmadığını bildirdilər. Bu səbəbdən də pandemiya dövründə uşaqlar online dərslərə qoşula bilmirlər.

Onu da bildirək ki, ötən ilin sonlarından etibarən qəsəbədaxili yolların çəkilməsi Avtomobil Yolları Dövlət Agentliyinə tapşırılıb. Qurumun açıqlamalarına görə, onlar 2023-cü ilə qədər bütün qəsəbədaxili yolların təmirini həyata keçirməyi planlaşdırırlar. Bakı şəhərinin 60 qəsəbəsi üzrə 2200 kilometr daxili küçələrin asfaltlanmasına ehtiyac var. Ötən il 300 kilometrə yaxın yolda təmir işləri aparılıb.

BAKU.WS